Juan Luna

From Wikfilipino
Jump to navigation Jump to search

Si Juan Luna y Novicio (23 Oktubre 1857-7 Disyembre 1899) ay isang Pilipinong pintor at bayani. Kilala siya para sa kaniyang obrang Spoliarium, isang dibuho ng pagkaladkad ng mga bangkay ng mga natalong gladyator sa Colosseum sa Roma. Ang nakakabagbag-damdaming eksenang ito ay maaaring itulad sa mga kasawian ng mga Pilipino sa ilalim ng Espanya.

Kabataan

Ipinanganak siya sa Badoc, Ilocos Norte, at ikatlo sa pitong anak nina Joaquin Luna at Laurena Novicio. Lumipat ang kanilang pamilya sa Maynila noong 1861 upang makakuha ng mabuting edukasyong. Nagkainteres si Juan Luna sa pagpipinta dahil sa impluwensya ng kaniyang kuya Manuel na magaling na pintor.

Edukasyon

Nag-aral si Juan Luna sa Ateneo de Manila, at sa Escuela Nautica. Naging manlalakbay-dagat siya. Sa pamamgitan nito, nakita niya ang magagandang tanawin sa Hongkong, Amoy, Singapore, Batavia, at Colombo. Kapag nasa Maynila siya, nagpapaturo pa rin siya kay Lorenzo Guerrero ng pagpipinta. Pumasok siya sa Academia de Dibujo Y Pintura sa Maynila ngunit pinaalis, marahil dahil ang kaniyang estilo ay hindi umaayon sa kagustuhan ng kaniyang maestro. Noong 1877, sa rekomendasyon ni Guerrero, pinaaral siya ng kaniyang magulang sa Escuela de Bella Artes sa Madrid. Subalit, hindi niya nagustuhan ang paraan ng pagturo dito. Noong nakilala niya ang pintor na si Don Alejo Vera, umalis siya sa eskwela upang maging aprentis niya.

Karera

Noong 1881, nanalo siya ng gintong pilak para sa kaniyang dibuhong La Muerta de Cleopatra sa pandaigdig na kumpetisyon na ang Exposición Nacional de Bellas Artes sa Madrid. Dahil dito naging pensionado siya ng Ayuntamiento ng Maynila sa kondisyon na gumawa siya ng larawan para sa kanila. Ilang taon ang lumipas bago niya natapos ito—ang El Pacto de Sangre. Noong 1884, ang kaniyang Spoliarium ay nagwagi ng isa sa tatlong gintong medalya sa Exposición Nacional de Bellas Artes. Ang kaniyang dalawang lahok sa Exposicion ng 1887, La Batalla de Lepanto at Rendicion de Granada ay nagwagi rin.

Pamilya

Noong 1885, lumipat siya sa Paris at nagbukas ng studio roon. Noong 1886, pinakasalan niya si Maria Paz Pardo de Tavera, ang kapatid ng kaniyang mga kaibigang sina Felix at Trinidad Pardo de Tavera. Nagkaroon sila ng dalawang anak subalit ang isa ay namatay habang sanggol pa.

Pagkabayani

Bumalik siya sa Pilipinas noong 1891 at dinakip siya kasama ng kaniyang kapatid na si Antonio Luna noong 1896 at ikinulong sa Fort Santiago dahil sila ay pinaghinalaan na taga-oraganisa ng rebolusyon ng mga Katipunero. Noong pinalaya siya noong 27 Mayo 1897, bumalik siya sa Europa. Sa pamahalaang rebolusyunaryo ni Emilio Aguinaldo, isa siya sa piniling maging bahagi ng delegasyon para sa negosasyon sa pagkilala ng Paris at Amerika sa bagong republika.

Nang pauwi na siya sa Pilipinas, tumigil siya sa Hong Kong kung saan inatake siya sa puso at namatay.

Pagkalipas ng ilang taon, ang kaniyang huling obrang Peuple et Rois na nakumpleto niya noong 1889 ay ikinonsiderang pinakamahusay na lahok sa Universal Exposition sa Saint Louis sa Amerika.

Sanggunian

  • Manuel, Arsenio. Dictionary of Philippine Biography, Volume II. Manila: Regal Printing Company, 1970.
  • Ocampo, Ambeth R. “Juan Luna's Works.” Philippine Daily Inquirer, 24 October 2007.
  • Sevilla, Jose N. Sa Langit ng Bayang Pilipinas: Mga Dakilang Pilpino o Ang Kaibigan ng mga Nag-aaral. Manila: Limbagan nina Sevilla at mga kapatid at Kn., 1922.
  • López Jaena, Graciano. "Juan Luna y Novicio: A biography." In Graciano López Jaena: Speeches, articles and letters, translated and annotated by Encarnación Alzona, edited and with additional annotations by Teodoro A. Agoncillo. Manila, Philippines: National Historical Institute, 1994. Pp. 167-178.
  • Paggunita kay Juan Luna

Pagkilala

WikiFilipino logo 150.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.

Luna