Jesse Robredo

From Wikfilipino
Jump to navigation Jump to search
DILG Secretary Jesse Robredo.jpg

Si Jesse M. Robredo (Mayo 27, 1958 – Agosto 18, 2012) ay dating kalihim ng Department of Interior and Local Government (DILG) sa termino ni Benigno S. Aquino III mula 2010 hanggang sa kaniyang pagyao noong 2012. Siya rin ay dati alkalde ng Naga, Camarines Sur at nagsilbi ng anim na termino.

Si Jesse ay asawa ni Bise Presidente Leni Robredo. Siya rin ang kauna-unahang Pilipinong alkalde na nakatanggap ng Ramon Magsaysay Award for Government Service noong 2000.

Noong Agosto 18, 2012 nasawi si Robredo matapos bumagsak ang sinasakyang maliit na aircraft na sinasakyan ni Robredo sa isang bahagi ng Masbate dahil sa pagkasira ng makina nito.

Personal na buhay

Si Jesse Manalastas Robredo ay ipinanganak noong Mayo 27, 1958 sa Naga, Camarines Sur. Siya ay anak nina José Chan Robredo Sr., isang Filipino-Chinese, at Marcelina Manalastas na isang Bikolana. Si Robredo ay mula sa angkan ng mga Chinese dahil ang kaniyang lolo na si Lim Pay Co na mula sa lalawigan ng Fujian, China at nagtungo sa Pilipinas sa pagsisimula ng ika-20 siglo. Ikatlo sa limang magkakapatid si Robredo: José “Butch” Robredo, Jr., isang negosyante; Jocelyn Robredo-Austria na naninirahan sa US; Jenny Robredo-Tang; at si Josephine “Penny” Robredo-Bundoc na nagtatrabaho sa Philippine General Hospital (PGH). Habang tumatanda ang ama ni Robredo, nakita niya kung paano ito unti-unting nawalan ng paningin dahil retinitis pigmentosa na namana rin ng dalawang kapatid ni Robredo.

Nag-aral si Robredo noong elementarya sa Naga Parochial School kung saan naging pambato siya sa chess. Kilala ang Naga Parochial School sa pagiging mahusay sa chess sa buong rehiyon ng Bicol ngunit ikalawang puwesto lamang ang nakuha ni Robredo noong siya ang lumaban. Noong 1970, pumasok siya sa Ateneo de Naga para mag-haiskul. Nasa ikalawang taon ng haiskul si Robredo nang ideklara ni dating Pangulong Ferdinand Marcos ang Batas Militar. Nag-aral naman ng kolehiyo so Robredo sa De La Salle University (DLSU) at kumuha ng digri na Industrial Management and Mechanical Engineering. Nagtrabaho si Robredo sa San Miguel Corporation noong 1980 sa Physical Distribution Technical Services ng General Services Division at matapos ang anim na buwan ay na-promote sa Finance Division. Noong 1985, natapos ni Robredo ang kaniyang Masters in Business sa University of the Philippines – Diliman, Lungsod Quezon. Mayroon ding digri sa Masters of Public Administration si Robredo na natapos niya John F. Kennedy School of Government – Harvard University noong 1999.

Matapos naman ang People Power Revolution noong 1986, nagkakilala sina Robredo at asawang si Leni. Umuwi raw sa Naga si Leni upang manatili roon ng isang taon bago magpatuloy ng kaniyang pag-aaral ng Law. Unang nagtagpo ang dalawa nang pumasok si Leni sa Bicol River Basin Development Program Office kung saan si Robredo ang namumuno. Sa ginawang panayam, pinasulat ni Robredo si Leni ng isang sanaysay at nakuha naman ang posisyon kalaunan.

Halos isang buwan nang pumapasok si Leni nang mag-umpisa siyang makatanggap ng liham at bulaklak ngunit hindi niya alam kung kanino nagmula. Nalaman niyang galing ito kay Robredo at dito ay nag-umpisa na silang lumabas. Ipinagpaalam ni Robredo si Leni sa mga magulang nito upang panoorin ang UP Concert Chorus sa Our Lady of Peñafrancia sa Naga City. Simula noon ay araw-araw nang dinadalaw ni Robredo si Leni at naging opisyal ang relasyon nila noong Oktubre 1986. Noong Abril 1987, namanhikan na si Robredo sa pamilya ni Leni. Hindi raw pumayag ang mga magulang ni Leni noong una dahil nais nilang makapagtapos ng abogasya ang anak ngunit dahil nangako si Robredo na magpapatuloy pa rin si Leni sa pagpasok sa Law School kahit kasal na sila, pumayag din ang mga ito. Ang pamilya ni Robredo ang namili ng petsa ng kanilang kasal na batay sa tradisyong Chinese.

Politika

Noong 1988, nahalal si Robredo bilang alkalde ng Naga sa edad na 29, isa sa pinakaunang batang alkalde sa Pilipinas. Naglingkod siya sa loob ng tatlong termino na nagtapos noong Hunyo 30, 1998. Noong 2001, muli siyang nahalal bilang alkalde ng Naga hanggang Hunyo 2010. Naglingkod si Robredo bilang alkalde ng Naga sa loob ng 19 na taon.

Sa kaniyang pamumuno sa Naga, minsang kinilala ang lungsod bilang isa sa Most Improved Cities in Asia ng Asiaweek Magazine noong 1999. Sa panahon din ng pamumuno ni Robredo unting-unting naibangon ang Naga City bilang isa sa mga premyadong lungsod sa rehiyon ng Bicol. Dahil sa maayos na pamumuno sa Naga, noong 1995 si Robredo ay nahalal bilang pangulo ng League of Cities of the Philippines, ang pambansang asosasyon ng mga alkalde sa Pilipinas. Pinamunuan din ni Robredo ang Metro Naga Development Council.

Noong 2010 din matapos ang termino niya bilang alkalde ng Naga, itinalaga si Robredo ni Pangulong Benigno S. Aquino III bilang kalihim ng DILG. Sa kaniyang pamumuno, naging prayoridad ni Robredo ang paglilipat sa mga naninirahang iligal sa iba’t ibang lugar sa Maynila upang maumpisahang malinis ang mga lugar na ito. Dahil bago ang proyektong ito sa Kalakhang Maynila, nagkaroon ng banggaan ang ilang lokal na opisyal sa tanggapan ng DILG. Kabilang sa mga umapela ay ang dating alkalde ng Lungsod Makati na si Jejomar Binay. Isang regional director din ang nagsampa ng reklamo sa Office of the Ombudsman laban kay Robredo ngunit ibinasura din ito.

Dalawang politiko mula sa Bicol naman ang tumiligsa sa pagtatalaga kay Robredo bilang kalihim ng DILG kabilang sina Luis Ortega at Luis Villafuerte Sr. Makailang ulit na hindi nakompirma ng Commission on Appointments ang posisyon ni Robredo. Gayunman, nakatakda na sanang makompirma ang pagiging kalihim ni Robredo noong Agosto 29, 2012 ngunit labing isang araw bago ito, yumao si Robredo dahil sa isang aksidente sa aircraft.

Kamatayan

Noong Agosto 18, 2012, nasawi si Robredo matapos bumagsak ang sinasakyan niyang Piper Seneca, isang maliit na aircraft sa Masbate. Papunta sana si Robredo sa Naga para sa kompetisyon sa swimming ng kaniyang anak. Mula sa Cebu City ang aircraft ngunit nagkaroon ng problema sa makina at tangkang magkakaroon ng emergency landing sa Masbate Airport ngunit bumagsak na sa karagatan sa Masbate. Nasawi si Robredo ngunit nakaligtas ang kasama ni Robredo na si Police Chief Inspector June Paolo Abrazado.

Inabot ng apat na araw bago nakita ang katawan ni Robredo. Nakita ang labi niya sa loob ng bumagsak na eroplano sa lalim na 180 talampakan. Ginawa ang burol sa labi ni Robredo sa Archbishop’s Palace sa Naga City at inilipat sa Malacañang noong Agosto 24, 2012. Ibinalik ang mga labi ni Robredo sa Naga at doon ay na-cremate.  Nakalagak ang mga abo ni Robredo sa Eternal Gardens Memorial Park.

Iginawad ni dating Pangulong Aquino ang Philippine Legion of Honor na may ranggong Chief Commander kay Robredo noong Agosto 28, 2012 bago ang ginawang state funeral.

Bilang pagkilala sa yumaong si Robredo, itinayo ang isang monumento at museo para sa kaniya sa Naga City Civic Center Grounds. Pinangunahan ni Aquino ang pagsisimula ng pagtatayo ng museo at monumento noong Marso 2013. Matapos ang apat na taon, sa pagdiriwang ng ikalimang taong kamatayan ni Robredo, pormal na binuksan sa publiko ang Museo ni Jesse Robredo.

Idineklara din ang Agosto 18 bilang Jesse Robredo Day sa Naga City. Ipinangalan din sa kaniya ang dalawang daan sa Bicol: ang Jesse M. Robredo Boulevard sa Masbate at Sec. Jesse Robredo Avenue sa Naga.

Mga Pagkilala at Karangalan

Bilang pagkilala sa kanyang natatanging nagawa sa serbisyo publiko, nakatanggap siya ng maraming parangal at pagkilala tulad ng Gantimpalang Ramon Magsaysay para sa Paglilingkod sa Gobyerno noong 2000, Konrad Adenauer Medal of Excellence bilang Pinakanatatanging Punung-Lungsod ng Pilipinas noong 1998, Outstanding Young Persons of the World (TOYP) Award noong 1990 at The Outstanding Young Men of the Philippines (TOYM), at ang pinakaunang gantimpalang “Dangal ng Bayan ” ng Komisyon sa Serbisyong Sibil.

Noong Marso 2008, ipinagkaloob kay Robredo ang honorary Doctor of Humanities degree ng Far Eastern University ng Maynila. Kabilang din siya sa mga board of trustees ng Synergeia Foundation Inc., isang koalisyon ng mga indibidwal, institusyon, at mga organisasyong naglalayong mapagbuti ang kalidad ng edukasyon sa Pilipinas. Kasama ang dating gobernador ng Isabela na si Grace Padaca at dating gobernador ng Pampanga na si Ed Panlilio, pinangunahan nila ang kilusang “Kaya Natin!” na naglalayong magkaroon ng tunay na pagbabago sa pamumuno sa Pilipinas.

Sanggunian

Pagkilala

WikiFilipino logo 150.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.