Himno al Trabajo

From Wikfilipino
Jump to navigation Jump to search

Ang Himno al Trabajo (Filipino: Dalit sa Paggawa; English: "Hymn to Labor") ay isang tula na isinulat ni Jose Rizal. Ang tula ay isinulat niya noong Enero 1888 para sa kaniyang mga kaibigang mula sa Lipa, Batangas bilang reaksyon sa Becerra Law, at para bigyang pugay ang pagsisikap ng mga Lipeño.

Ang tula ay tungkol sa pagsisikap ng mga Lipeño para sa bayan. Ito ay binubuo ng mga pag-uusap ng mga lalake, babae at bata kung saan pinupuri nila ang mga taong naghahanap buhay sa sektor ng agrikultura. Sinasabi rin sa tula na ang agrikultura ang solusyon sa kahirapan at ang daan sa pag-unlad.

Kasaysayan

Noong 1888 bago umalis si Rizal sa Calamba,Laguna isang kaibigan na nagmula sa Lipa ang humiling na siya ay lumikha ng isang tula para sa nalalapit na pagdiriwang ng lugar bilang isang lungsod alinsunod sa Batas ng Becerra ng 1888. Sa tulang ito, pinuri at inilarawan ni Rizal ang kasipagan ang mga taga-Lipa at ang iba't-ibang tungkuling ginampanan ng mga tao ng lungsod—mula sa mga kababaihan hanggang sa mga ina; sa mga ama at sa umaasa pang maging ama; at sa mga bata at sa susunod na salinlahi.

Nilalaman

Koro:

Dahilan sa Bayan sa pagdirigmaan
Dahil sa Bayan din sa kapayapaan
Itong Pilipino ay maasahang
Marunong mabuhay o kaya’y mamatay.

(Mga Lalaki)

Nakukulayan na ang dakong Silangan
Tayo na sa bukid, paggawa’y simulan
Pagka’t ang paggawa’y siyang sumusuhay
Sa bayan, sa angkan, sa ating tahanan.

Lupa’y maaring magmamatigas naman
At magwalang-awa ang sikat ng araw
Kung dahil sa anak, asawa at Bayan
Ang lahat sa ating pagsinta’y gagaan.

Koro:
(Mga babaing may Asawa)

Magmasigla kayong yao sa gawain
Pagka’t ang baba’y nasa-bahay natin
At itinuturo sa batang mahalin
Ang Bayan, ang dunong at gawang magaling

Pagdatal ng gabi ng pagpapahinga
Kayo’y inaantay ng tuwa’t ligaya
At kung magkataong saama ang manguna
Ang magpapatuloy ang gawa’y ang sinta.

Koro:
(Mga Dalaga)

Mabuhay! Mabuhay! Paggawa’y purihin
Na siyang sa Baya’y nagbibigay-ningning!
At dahil sa kanya’y taas ng paningin
Yamang siya’y dugo at buhay na angkin.

At kung may binatang nais na lumigaw
Ang paggawa’y siyang ipaninindigan;
Sapagka’t ang taong may sipag na taglay
Sa iaanak nya’y magbibigay-buhay.

Koro:
(Mga Bata)
Kami ay turuan ninyo ng gawain;
At ang bukas ninyo’y aming tutuntunin
Bukas, kung tumawag ang bayan sa amin
Ang inyong ginawa’y aming tatapusin.

Kasabihan niyong mga matatanda:
“Kung ano ang ama’y gayon din ang bata,”
sapagka’t sa patay ang papuri’y wala.
Maliban sa isang anak na dakila.


Sanggunian

  • [1] (Hianango noong Hulyo 28, 2010)
  • [2] (Hinango noong Hulyo 28, 2010)


Pagkilala

WikiFilipino logo 150.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.