Gonzalo Ronquillo de Peñalosa

From Wikfilipino
Jump to navigation Jump to search

Si Gonzalo Ronquillo de Peñalosa ay ang ikaapat na naging gobernador-heneral ng Pilipinas noong panahon ng pananakop ng mga Espanyol. Siya ay naglingkod mula Abril 1580 hanggang 10 Marso 1583. Siya ang pumalit kay Francisco de Sande.

Si Peñalosa ay ipinanganak sa Arevalo, Spain. Nagsilbi siyang sheriff sa Real Audencia sa Mexico bago nahirang na gobernador-heneral ng Pilipinas.

Bilang Gobernador-Heneral

Idineklara ni Peñalosa ang Maynila bilang sentro ng politika at ekonomiya noong 1582. Itinatag din niya ang Palacio del Gobernador sa Intramuros.

Bilang tugon ni Peñalosa sa ilang Pransiskano na nais umalis sa Pilipinas para sa kanilang misyon sa Tsina, ipinatupad niya ang isang kautusan na nag-aatas na walang sinoman ang maaaring makaalis sa bansa nang walang permiso sa Hari ng Espanya.

Sa kaniyang mga ulat sa Hari ng Espanya, inirekomenda niya ang pagpapatatag ng depensa ng Maynila sa pamamagitan ng pagpapatayo ng mga pader. Sinabihan siya ng hari na magpatupad ng repartimiento o ang sapilitang pagpapagawa sa mga Indio.

Maraming reklamo ang inihain ng mga kaaway laban kay Peñalosa bago ito namatay sa kaniyang tirahan sa Maynila.

Saglit na humalili sa kaniya bilang gobernador-heneral ang kaniyang pamangkin na si Diego Ronquillo.

Pinagbatayan

Carlos L. Quirino, ed. Maria Eloisa G. Pargo de Castro. “Governors-General of the Philippines.” Old Manila 2nd Edition, p. 288. Quezon City: Vibal Foundation, 2020.

Pagkilala

WikiFilipino logo 150.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.