GABRIELA

From Wikfilipino
Jump to navigation Jump to search

Ang General Assembly Binding Women for Reforms, Integrity, Equality, Leadership, and Action (GABRIELA) ay isang organisasyon sa Pilipinas na nagtataguyod ng mga programa para sa kaunlaran ng kababaihan. Ito ay ipinangalan kay Gabriela Silang, isang bayani at rebolusyonaryong namuno sa isang rebelyon laban sa mga Espanyol noong panahon ng kolonyalisasyon. Ito ay itinatag noong 1984 sa panahong umiiral ang Batas Militar sa Pilipinas sa ilalim ni dating Pangulong Ferdinand E. Marcos.

Deskripsiyon

  • Ang GABRIELA ay isang kilusan na tahasang nakikialam sa problemang kinakaharap ng mga babae upang sila ay mapalaya sa anomang kalupitan, diskriminasyon, karahasang sekswal at pang-aabuso, kapabayaan, at pagtanggi sa kanilang karapatang pangkalusugan at reproduksiyon.
  • Ang GABRIELA ay may layuning ipaglaban ang kalayaan at pagkakapantay-pantay ng kababaihan sa kalalakihan sa halos lahat ng aspekto ng buhay.
  • Ang GABRIELA ay isang esensyal na kilusan upang tumulong sa pagtataguyod at pagbubunsod ng kalayaan sa halos kalahati ng populasyon ng sambayanan.

Kasaysayan

Dahil sa pangangailangan ng pagbabago sa politika at ekonomiya noong panahon ng Batas Militar, 42 kababaihan ang nagsanib-puwersa upang maItatag ang GABRIELA. Sa kasalukuyan, ito ay sentro ng tinatayang 250 organisasyon, institusyon, departamento, at mga programang pangkababaihan. Kalahok dito ang mga manggawang kababaihan, pesante, maralitang taga-lungsod, mga ginang ng tahanan, propesyonal, mga deboto, at mga estudyante sa buong bansa.

Kasapian

Ang GABRIELA ay isang network ng mga grupo, institusyon at mga programa kung saan ang mga miyembro ay aktibong lumalahok at ipinaglalaban ang mga isyu sa karapatan, karukhaan, globalisasyon, militarismo, karahasan, kalusugan, sex trafficking, at iba pang mga isyu na nakaka-apekto sa mga kababaihan.

Ang GABRIELA ay may mga regional chapter sa buong Kamaynilaan, Cordillera Administrative Region, at Mindanao at mga sub-regional chapter sa Negros, Panay at Samar gayundin ang mga provincial chapter sa Bicol at Cebu.

Kinatawan sa Kongreso

Noong 2003, nailunsad ang Gabriela Women’s Party sa suporta ng mga kasapi ng GABRIELA at iba pang organisasyon. Noong Halalan 2004, nagwagi ito ng isang puwesto bilang party-list sa Kongreso kung saan nakatanggap ito ng 464,586 boto. Si Liza Maza ang kinatawan nito sa Kongreso. Dalawang puwesto naman ang napanalunan ng grupo noong Halalan 2007. Nakasama ni Maza si Luzviminda Ilagan na umupo sa Kongreso. Nagwagi rin ang Gabriela Women’s Party sa mga ginanap na halalan noong 2010, 2013, 2016, at 2019.

Halalan Boto % Puwesto
2004 464,586 3.65% 1
2007 621,171 3.89% 2
2010 1,001,421 3.31% 2
2013 713,492 2.60% 2
2016 1,367,795 4.22% 2
2019 445,696 1.61% 1

Mga Kinatawan sa Kongreso

  • 13th Congress (2004–2007) - Liza Maza
  • 14th Congress (2007–2010) - Luzviminda Ilagan, Liza Maza
  • 15th Congress (2010–2013) - Luzviminda Ilagan, Emerenciana de Jesus
  • 16th Congress (2013–2016) - Luzviminda Ilagan, Emerenciana de Jesus
  • 17th Congress (2016–2019) - Emerenciana de Jesus, Arlene Brosas
  • 18th Congress (2019–kasalukuyan) - Arlene Brosas

Mga Sanggunian

Pagkilala

WikiFilipino logo 150.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.