Cordillera Administrative Region

From Wikfilipino
Jump to navigation Jump to search

Ang Cordillera Administrative Region (CAR) ay matatagpuan sa hilagang bahagi ng Luzon. Napagigitnaan ito ng Rehiyon I (Ilocos) at ng Rehiyon ng Cagayan Valley. Ang salitang cordillera ay nagmula sa Spanish na nangangahulugang “bulubundukin.” Ang bulubundukin ay tumutukoy sa lugar kung saan maraming bundok ang nakapalibot.

Ang kabuoang rehiyon ay kinalalagyan ng bulubundukin na kung tawagin ay Cordillera Central. Isang napakagandang tanawin ng kabundukan ang mamamasdan kung maglalakbay sa rehiyon.

Lalawigan at Lungsod

Binubuo ang rehiyon ng anim na lalawigan at isang lungsod: Abra, Apayao, Benguet, Ifugao, Kalinga, at Mountain Province. Ang Lungsod na ito ay ang Baguio ang kaisa-isa sa buong Cordillera.

Ang CAR lamang ang rehiyon sa Pilipinas na napagigitnaan ng mga lupain. Nangangahulugan itong ang rehiyon ay malayo sa mga pangunahing daluyanan ng tubig. Ito ay napaliligiran o nababakuran ng iba pang rehiyon.

Mga Mamamayan

Igorot ang pangkalahatang tawag sa mga katutubong pangkat na naninirahan sa CAR. Hangga’t maaari, pinananatili ng mga Igorot ang kanilang katutubong kultura at pamayanan. Isa sila sa mga katutubong pangkat na hindi gaanong naimpluwensiyahan ng mga Espanyol nang sakupin nila ang Pilipinas mula ika-16 hanggang ika-19 dantaon.

Buong tapang na ipinagtanggol ng mga Igorot ang kanilang lupain laban sa mga Espanyol. Salamat sa kanilang matatag na depensa at sa Cordillera Central na mahirap daanan, ang mga Espanyol ay sumuko rin sa pagsakop sa rehiyon.

Pamumuno

Narito ang lista ng ihinalal na pinuno at representante sa kongreso ng bawat lalawigan at distrito na magsisilbi sa mamamayan ng Cordillera Administrative Region mula 2019 hanggang 2022.

Lalawigan Gobernador Bise Gobernador Mga Kinatawan sa Kongreso
Abra Maria Jocelyn V. Bernos Ronald S. Balao-as Joseph Sto. Niño B. Bernos, Nag-iisang Distrito
Apayao Elias Bulut, Jr. Hector Reuel Pascua Elias C. Bulut Jr., Nag-iisang Distrito
Benguet Melchor D. Dinglas Johny D. Waguis Nestor B. Fongwan, Nag-iisang Distrito; Mark O. Go, Nag-iisang Distrito ng Lungsod ng Baguio
Ifugao Jerry U. Dalipog Glenn D. Prudenciado Solomon R. Chungalao, Nag-iisang Distrito
Kalinga Ferdinand B. Tubban Dave Q. Odiem Allen Jesse C. Mangaoang, Nag-iisang Distrito
Mountain Province Bonifacio C. Lacwasan Jr. Francis O. Tauli Maximo Y. Dalog Jr., Nag-iisang Distrito

Populasyon

Batay sa senso na nakalap ng National Statistics Office hanggang 1 Mayo 2010, umabot sa 1,616,867 ang populasyon ng rehiyon, kumpara sa 1,146,191 bilang noong 1990. Pinakamarami ang bilang ng mamamayan na bumubuo sa lalawigan ng Benguet (hindi pa kasama ang Lunsod ng Baguio). May kabuuang growth rate ang rehiyon na 1.73 batay sa datos na mula taong 1990 hanggang 2010 [1].

Lalawigan Populasyon: 1990 – 2000 – 2010 Growth Rate: 1990-2000 – 2000-2010 – 1900-2010
Abra 184,743 – 209,491 – 234,733 1.26 – 1.14 – 1.20
Apayao 74,720 – 97,129 – 112,636 2.66 – 1.49 – 2.07
Benguet (hindi pa kasama ang Lungsod ng Baguio) 302,715 – 330,129 – 403,944 0.87 – 2.04 – 1.45
Lungsod ng Baguio 183,142 – 252,386 – 318,676 3.26 – 2.36 – 2.81
Ifugao 147,281 – 161,623 – 191,078 0.93 – 1.69 – 1.31
Kalinga 137,055 – 174,023 – 201,613 2.41 – 1.48 – 1.95
Mountain Province 116,535 – 140,631 – 154,187 1.90 – 0.92 – 1.41

Wika

Ilan sa mga wikang matatagpuang ginagamit sa Kordilyera ay ang mga wikang Kankana-ey, Tagalog, Ibaloi, Kalanguya, Ifugao, Aplai, Itneg, Tinguian, Ingles, at ang Iloko bilang kanilang lingua franca.

Mga Sanggunian

Pagkilala

WikiFilipino logo 150.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.