Bayan Ko

From Wikfilipino
Jump to navigation Jump to search

Ang “Bayan Ko” ay isang makabayang awitin na nilikha ni Constancio de Guzman noong 1928. Ito ay isang kundiman, tradisyonal at malamyos na awit na karaniwang tungkol sa pag-ibig.

Tula ng Kalayaan

Isinulat ni Jose Corazon de Jesus, kilala rin bilang si Huseng Batute, ang “Bayan Ko” bilang isang tula. Isinulat niya ito upang ipahayag ang pagnanais niyang mapalaya ang Pilipinas sa kamay ng mga Amerikano. Kinalaunan, nilapatan ito ng musika ni de Guzman.

Naisalin din sa iba’t ibang wika ang awit na ito tulad ng “My Own Country” sa Ingles at “Nuestra Patria” sa Spanish. Simula noon ay naging paborito na itong awit ng mga Pilipino. Naging mahalagang bahagi rin ang “Bayan Ko” sa pagkakamit ng kalayaan ng bansa.

Awit ng Pagbabago

Higit na sumikat ang “Bayan Ko” noong panahon ng Batas Militar at Aklasang Bayan sa EDSA. Inawit ito bilang protesta sa pamumuno ni dating Pangulong Ferdinand E. Marcos. Tugma ang liriko ng awit upang buhayin ang diwang makabansa ng mga Pilipino. Gayunman, ipinagbawal ni Marcos ang pag-awit nito sa mga tanghalan. Pagkakakulong ang parusa ng mga lalabag nito.

Nang pumanaw si Benigno S. Aquino Jr., inawit ito ng taumbayan sa kaniyang libing bilang pagpapahayag na nais nilang lumaya mula sa diktadurya ni Marcos.

Narito ang sipi ng tula ng awitin:

Ang bayan kong Pilipinas,

Lupain ng ginto’t bulaklak.

Pag-ibig ang sa kaniyang palad

Nag-alay ng ganda't dilag.


At sa kanyang yumi at ganda,

Dayuhan ay nahalina

Bayan ko, binihag ka,

Nasadlak sa dusa.


Ibon mang may layang lumipad,

Kulungin mo at umiiyak!

Bayan pa kayang sakdal dilag,

Ang di magnasang makaalpas?


Pilipinas kong minumutya

Pugad ng luha ko’t dalita,

Aking adhika,

Makita kang sakdal laya!

Nagkaroon na rin ng iba’t ibang bersiyon ang “Bayan Ko” na inawit ng mga tanyag na mang-aawit sa bansa tulad nina Freddie Aguilar, Kuh Ledesma, at Lea Salonga.

Sanggunian

Raul C. Navarro, ed. Galileo S. Zafra Babaylan. “Bayan Ko.” 2000 Sagisag Kultura ng Filipinas, Edisyong 2013. Filipinas Institute of Translation, Inc. PDF.

Pagkilala

WikiFilipino logo 150.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.