Francisco de Sande

From Wikfilipino
Revision as of 12:12, 9 April 2021 by Rclacuata (talk | contribs)
(diff) ← Older revision | Latest revision (diff) | Newer revision → (diff)
Jump to navigation Jump to search

Si Francisco de Sande ang ikatlong naging gobernador-heneral ng Pilipinas noong panahon ng pananakop ng mga Espanyol. Siya ay naglingkod mula 25 Agosto 1575 hanggang Abril 1580. Pinalitan niya sa puwesto si Guido de Lavezaris. Si Sande ay ipinanganak sa Caceres, Spain. Naglingkod siya bilang piskal at awditor sa Mexico, kolonya ng Espanya.[1]

Noong 1575, hinirang siya ni Haring Felipe II na pumalit kay Lavezaris bilang gobernador-heneral ng Pilipinas.[1]

Organisadong Pamamahala

Nang dumating si Sande sa Pilipinas noong 1575 ay agad siyang umupo sa kaniyang puwesto. Kilala siya sa kaniyang organisadong pangangasiwa ng kolonya at pagpapatupad ng mga ordinansa.[1] [2]

Sa kaniyang panunungkulan, kinumpiska niya ang mga encomienda ng mayayamang Espanyol, kabilang na ang kay Lavezaris, at ipinamahagi sa mga katutubong orihinal na nagmamay-ari ng mga lupain.[1]

Noong 1578, ipinadala niya si Pedro de Chavez upang sakupin ang timog-silangang Luzon. Naitatag niya ang Nueva Caceres (kasalukuyang Camarines Sur). Sa kaniya ring panunungkulan dumating ang unang Agustinong prayle sa Maynila at naitayo ang Simbahan ng San Agustin.[2]

Sinuportahan din niya ang ilang ekspedisyon sa Borneo, Moluccas, at Tsina.[1]

Pagtatangkang Sakupin ang Mindanao

Makalipas ang ilang buwan, ipinadala ni Sande ang mayamang enkomendero ng Iloilo na si Esteban Rodriguez de Figueroa sa Sulu at Mindanao. Mithiin niyang mapasunod ang mga mamamayan nito, makapagpataw ng taunang buwis (sa pamamagitan ng pagbabayad ng perlas), at palayain ang mga aliping Bisaya, partikular ang mga nabinyagang Kristiyano. Higit sa lahat, nais niyang matuldukan na ang pamimirata ng mga Muslim, makumpiska ang kanilang mga bangka (maliban sa mga ginagamit sa pangingisda), at matulungan silang makapagtanim. [2]

Inatasan din niya si Figueroa na makipag-ayos sa mga pinuno ng tribu, pigilan ang pagpapalaganap ng Islam, at hayaan ang mga Kristiyanong misyonero na ibahagi ang Salita ng Diyos. Hangad ni Sande na matigil ang pagbebenta ng mga piratang Muslim ng mga nabibihag nilang Indio, na ipinagbibili nila sa ibayong-dagat bilang mga alipin.[2]

Mga Sanggunian

  1. 1.0 1.1 1.2 1.3 1.4 Carlos L. Quirino, ed. Maria Eloisa G. Pargo de Castro. “Governors-General of the Philippines.” Old Manila 2nd Edition, p. 288. Quezon City: Vibal Foundation, 2020.
  2. 2.0 2.1 2.2 2.3 Vestiges Jose S. Arcilla, S.J. “Francisco de Sande.” Business World, 5 Mayo 2014. https://www.bworldonline.com/content.php?section=Opinion&title=francisco-de-sande&id=86942. Accessed 22 Pebrero 2021.  

==Pagkilala==

WikiFilipino logo 150.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.