Pista ng Binatbatan

Mula sa Wikifilipino
Tumalon sa: paglilibot, paghahanap

Kung nais ninyong mabása ang tekstong nakasulat sa Ingles, pindutin ang Binatbatan Festival

Pista ng Binatbatan


Isa ang Pista ng Binatbatan sa mga dahilan kung bakit dinarayo ng maraming lokal at banyagang turista ang Vigan sa Ilocos Sur. Daan-daang residente at turista ang nagkukumpulan sa kalye ng Crisologo na puno ng mga ansestral na tahanan upang masilayan ang iba't ibang tampok na programa ng nasabing pista.

Isang linggong puno ng kasiyahan at pagdiriwang ang Pista ng Binatbatan kasabay ng ibang pagdiriwang tulad ng Pista ng Longanisa na kung saan sikat rin ang Ilocos at ang Amazing Heritage Race.

Mga nilalaman

[baguhin] Kasaysayan

Hango ang terminong Binatbatan mula sa salitang Iloko na batbatin. Isa itong pamamaraan upang paghiwalayin ang mga binilong bulak mula sa buto ng puno ng Kapas Sanglay. Ang mga binilong bulak ay kinidkid at ginamit upang maghabi ng mga Abel na ikinalakal ng mga Intsik na noo'y naninirahan sa Ciudad Fernandina. Ang mga mangangalakal na ito ay nagluluwas ng mga lokal na produkto mula ika-15 hanggang ika-18 siglo. Ang Binatbatan ay isa na ngayong kilalang sayaw ng mga Ilokano.

Pista ng Binatbatan

[baguhin] Mga Pangyayari

Sa pista ng Binatbatan ay ipinamamalas ang galing ng mga kalahok sa street dance o pagsasayaw sa kalsada. Bawat kalahok ay sumasayaw na suot ang hinabing abel at sumusunod sa saliw ng nakaugalian at orihinal na sayaw ng Binatbatan.

Ang pagsasayaw ay ginagawa upang isalarawan o isabuhay ang mahaba at masusing proseso ng pagpukpok sa balat ng bunga ng bulak gamit ang dalawang patpat ng kawayan upang paghiwalayin ang mga buto mula sa balahibo na tinatawag na batbat. Ang batbat ang unang proseso sa paggawa ng Abel, isang hinabing tela. Nakikilahok ang mga residente sa pagsasayaw ng Binatbatan sapagkat ang tradisyunal na paggawa ng Abel ang isa sa mga pangunahing pinagkukunan ng ikinabubuhay ng mga residente mula noong bago pa dumating ang mga Kastila hanggang sa kasalukuyang panahon.

Ang Pista ng Binatbatan ay ang pinakatampok na programa sa taunang Pista ng Sining ng Vigan o Viva Vigan Festival of Arts. Lahat ng tao, mapa-residente man o turista ay nakikilahok sa pagsayaw. Ang mga kasapi ay gumagamit din ng makukulay na mga kasuotan at Abel at maging mga patpat ng kawayan sa pagsasayaw.

Nagdiwang ng ika-125 taon ang Pista ng Binatbatan noong taong 2008. Ito ay kaalinsabay ng Taon ng Pasasalamat ng mga residente sa kanilang patron at tagapagligtas na si Apo Sto. Cristo Milagros.

[baguhin] Sanggunian

[baguhin] Panlabas na Kawing

[baguhin] Pagkilala

Wikifilipino.png Orihinal na nilalaman mula sa WikiFilipino sa bisa ng GNU Free Documentation License. Tingnan ang pagtanggi.