Bata, Bata...Pa'no Ka Ginawa?

Mula sa Wikifilipino
Tumalon sa: paglilibot, paghahanap


Bata, Bata… Pa’no Ka Ginawa?
160px
Director:
Genre: Kathang-isip
Writer: Lualhati Bautista
Starring:
Music  :
Cinematography :
Editing :
Released:
Country: Philippines
Language: Tagalog
IMDB ID

Ang Bata, Bata… Pa’no Ka Ginawa? ay isang nobela na isinulat ng batikang manunulat na si Lualhati Bautista. Hinggil ito sa pagbabago ng ginagampanang papel ng babae, katulad ng may-akda, sa lipunan ng mga Pilipino na dating pinaiinog lamang ng mga kalalakihan.[1]

Ang nobelang ito na may 32 kabanata ay nagsasalaysay ang buhay ni Lea, isang nagtatrabahong ina na may dalawang anak – isang batang babae at isang batang lalaki – kung kaya’t makikita rito ang paglalarawan ng pananaw ng lipunan tungkol sa kababaihan, pagiging ina, at ang kung paano ganapin ng ina ang kaniyang pagiging magulang sa makabagong panahon.[1]

Naging pelikula rin ang mahabang salaysaying ito, na ginanapan ni Vilma Santos bilang Lea noong 1998. Pinangasiwaan ng direktor na si Chito S. Roño ang pagsasapelikula ng nobela.[1][2]

Mga nilalaman

[baguhin] Mga pangunahing tauhan

  • Lea – ang bidang babae sa nobela
  • Maya – anak na babae ni Lea
  • Ojie – anak na lalaki ni Lea
  • Ding – lalaking kinakasama ni Lea, ama ni Maya
  • Raffy – unang asawa ni Lea, ama ni Ojie
  • Johnny – kaopisina at matalik na kaibigan ni Lea

[baguhin] Buod

Nag-uumpisa ang katha sa pagtatapos ng anak na babae ni Lea na si Maya mula sa kindergarten, kung saan nagkaroon ng palatuntunan at pagdiriwang. Sa simula, maayos ang takbo ng buhay ni Lea – ang buhay niya na may kaugnayan sa kaniyang mga anak, sa mga kaibigan niyang mga lalaki, at sa kaniyang pakikipagtulungan sa isang samahan na pangkarapatang-pantao. Subalit lumalaki na ang mga anak niya – at nakikita niya ang mga pagbabago sa mga ito. Nagsisimula nang magbago ng mga pag-uugali ng mga ito: si Maya sa pagiging paslit na may kuryosidad, samantalang si Ojie ay tumatawid na patungo sa pagiging isang ganap na lalaki.[1]

Nagbalik ang dating asawa ni Lea upang kunin at dalhin sana si Ojie sa Estados Unidos. Natakot siyang baka kapwa kunin na ang kaniyang mga anak ng kanilang mga ama. Kailangan niya ring gumugol ng panahon para sa trabaho at sa samahang tinutulungan niya.[1]

Sa bandang huli, nagpasya ang mga anak niyang piliin siya – isang pagpapasyang hindi niya iginiit sa mga ito.

Nagwawakas ang katha sa isa ring pagtatapos ng mga mag-aaral, kung saan panauhing pandangal si Lea. Nagbigay siya ng talumpati na ang paksa ay kung paano umiiral ang buhay, at kung paano sadyang kay bilis ng panahon, na kasingbilis ng paglaki, pagbabago, at pag-unlad ng mga tao. Nagiwan siya ng mensahe na hindi wakas ang pagtatapos mula sa paaralan sapagkat iyon ay simula pa lamang ng mga darating pang mga bagay sa buhay ng isang tao.[1]

[baguhin] Pagsasalinwika

Ang mga sipi mula sa mga nobelang ito ni Lualhati Bautista ay napabilang sa antolohiyang Tulikärpänen, isang aklat ng mga maiikling kuwento na isinulat ng mga kababaihang Pilipino na inilimbag sa Finland ng The Finnish-Philippine Society (Ang Samahang Pinlandes-Pilipino, o FPS), isang hindi-pampamahalaang organisasyon na itinatag noong 1988. Pinatnugutan at isinalin ni Riitta Vartti, at iba pa, ang Tulikärpänen. Sa Firefly: Writings by Various Authors (Alitaptap: Mga Sulatin ng Iba't Ibang May-akda), ang bersiyong Ingles ng kalipunang Pinlandes, ang sipi mula sa Bata, Bata, Pa'no Ka Ginawa? ay pinamagatang Children's Party (Handaang Pambata).[3][4][5]

[baguhin] Mga talasanggunian

  1. 1.0 1.1 1.2 1.3 1.4 1.5 Bata, Bata… Pa’no Ka Ginawa?, buod, mga tauhan, pagsusuri ng mga tauhan, may-akda, malalimang pagsusuri ng nobela, at mga nangasiwa sa pagsasapelikula ng nobela, Geocities.com, nakuha noong: Marso 15, 2008
  2. Bata, Bata... Paano ka ginawa? (1998), full cast and crew, IMDb.com, nakuha noong Marso 15, 2008
  3. Firefly: Writings by Various Authors (Salinwika ng mga katha ni Lualhati Bautista sa wikang Pinlandes at Ingles), pinatnugutan at isinalinwika ni Riitta Vartti, at iba pa, Our Own Voice (Ang sarili nating tinig) Hunyo 2001 (OOV Bookshelf 2001), nakuha noong: Mayo 27, 2007
  4. Bata, Bata Pa'no Ka Ginawa? (Lea's Story/Kuwento ni Lea): Pahina ng Pamagat mula sa Geocities.com, nakuha noong: Mayo 27, 2007
  5. Buod ng Bata, Bata Pa'no Ka Ginawa? (Lea's Story/Kuwento ni Lea), buod ng bawat kabanata, nasa wikang Ingles, mula sa Geocities.com, nakuha noong: Mayo 27, 2007

[baguhin] Mga talaugnayang palabas